Кӱшыл шинчымашым пуышо театр училище марий группым пога

М.С.Щепкин лӱмеш кӱшыл шинчымашым пуышо театр училище (институт) актёр факультетшын калыкле курсышкыжо самырык ӱдыр-рвезе-влакым тунемаш налме нерген увертара

Вузышто кӱрылтыш деч посна кечывал йӧн дене 4 ий тунемман.

Вузын национальный курсышкыжо пураш кумылан самырык еҥ марий йылмым палышаш.

Тунемаш пурымо годым «Руш йылме», «Литература» предмет-влак дене ЕГЭм эртыман.

Школым 2011 ийыште пытарыше самырык еҥ ЕГЭм шочмо школыштыжо кучышаш. Шарнызӓ те школышто кызыт ЕГЭм руш йылме да математика дене кучеда, а М.С.Щепкин лӱмеш кӱшыл шинчымашан театральный училищышке (институтышко) руш йылме да литература дене к¢леш. Сандене экзаменым руш йылме да литература дене кучымыда нерген школышто ончылгоч увертарыман.

Школым ондакак тунем пытарыше-влак руш йылме да литертура дене ЕГЭм эртен огытыл гын, экзаменым кучаш илыме верыштышт йодмашым пышаш улыт.
— 2009 ий 1 январь марте кыдалаш (тичмаш) образованийым налше-влак,
— кӱшыл шинчымашан еҥ-влак,
— «Драматический театрын да кинон актёржо» специальность дене кыдалаш образованиян-влак

ЕГЭм кучымо деч посна тунемаш пурен кертыт.

Нуно «Руш йылме» да «Литература» дене ешартыш тергымашым М.С.Щепкин лӱмеш ВТУ-н (институтын) приёмный комиссийже ончылно эртат.
Тунемаш пурымо экзаменым кучымо деч посна абитуриент-влак
— актёрын мастарлыкше,
— пластика,
— коллоквиум
дене ешартыш тергымашым эртат.

Абитуриент-влак тунемаш пурымо экзаменым кучымо деч ончыч тергымашым (отборочный консультацийым) эртышаш улыт.

Тергымаш кок тур гыч шога.

Икымше тур апрель гыч тӱҥалын июнь кыдал марте кажне шуматкечын 11.00 ден 13.00 шагат коклаште Шкетан лӱмеш Марий кугыжаныш драме театрыште эрта. Тугеже кеч-могай шуматкечын кумылан-влак артист мастарлыкыштым ончыкташ театрыш толын кертыт.

Икымше тур тергымашым виктарен шогышо комиссий апрельыште тыгак Марий Элнан районлашкыже лектын кошташ да тунемаш пураш кумылан ӱдыр-рвезе-влакым верыштак аклен ончаш тӱналеш. Тылеч посна ты комиссий апрельыштак марий калыкын тӱшкан илыме моло кундемышкыжат миен шуэш: Пошкырт кунемысе Нефтекамск олашке, Мишкан посёлкышко да Калтаса селашке, Свердловск областьысе Кугу Тавра селашке да Киров областьысе Яран олашке. (Республикынан районлаштыже да пошкудо кундемлаште Отборочный консультацийын могай числаште лиймыже нерген посна увертарена.)

Тиде турлан абитуриент-влак творческий программым ямдылышаш улыт. Кутырен моштымо, образым раш да чын чоҥымо мастарлыкым, произведенийын шонымашыжым умылен моштымым ончыктышашлан абитуриент наизусть лудаш басньым, почеламутым, проза дене возымо произведений гыч ужашым (кажне жанр дене кокыт деч шагал огыл) рушла да марла ямдылышаш. Но иктым шотыш налмаҥ тыгодым классикыш савырныше авторынат да кызытсе сылнымут гыч произведенийымат налман. Но нуно возымо ойытем (стиль) да жанр шот дене ойыртемалтшаш улыт.

Тергымашым эртыме деч вара педагог-влак эн чот келшыше абитуриентлан ешартыш консультацийым эрташ темлен кертыт. Тидлан ондаксе программа деч посна кажныже кумылжылан келшыше кок-кум мурым да романсым ямдылышаш (тыгодым фонограмма лийшаш огыл, но аккомпанемент лийын кертеш).

Пытартыш йыжыҥ семын июньын кокымшо пелыштыже (раш жапым ешарен увертарена) Шкетан лӱмеш Марий кугыжаныш драма театрыште экзамен деч ончыч консультаций лиеш. Ӱдыр-рвезе-влакын актёр мастарлыкыштым ынде приёмный комиссий терга, тыште М.С.Щепкин лӱмеш кӱшыл шинчымашан театральный училище (институт) гыч толшо ныл педагог лиеш. Ты гана почеламутым, басньым, ойлымаш гыч ужашым лудмо деч посна, мурен да куштен моштымо мастарлыкат тергалтеш.

Кум консультацийымат эртыше абитуриент-влак тунемаш пурымо экзаменым кучат. Нуно кӱлеш чыла документым пуышаш улыт:
— образований (кыдалаш) тичмаш образований нерген аттестат але диплом) нерген документ;
— ЕГЭн (Руш йылме, Литература) результатше почеш сертификат;
— тений налме медицинский справка (286 але 086 форма);
— 3х4 сантиметр кугытан 8 фотокартычке (вуйчием деч посна, матовый кагазеш ыштыме);
— рвезе-влаклаҥ приписной свидетельство але военный билет.

«Актёрын мастарлыкше» — репертуарым лудмаш, мурым мурымаш

«Пластика» — педагог-влакын кӱштымышт почеш куштымашым да сценыште шкем кучен моштымым ончыктымаш.

«Коллоквиумышто» абитуриент-влаклан литература, драматургий, изобразительный искусство, театр, музыка, тыгак элыштына, тӱнямбалне кызытсе мер-политик илышыште лийын шогышо событий-влак нерген йодыш-шамыч лийыт.

ЕГЭн результатше деч посна тунемаш пурышо-влак «Руш йылме» дене сочиненийым возат, «Литература» дене школ программа дене келшышын билет йодыш-влаклан вашештат.

Чыла экзамен 100 балл шкала дене аклалтеш.

«Руш йылме» да «Литература» предметла дене эн шагал баллым Россий Образований да наука министерствын пеҥгыдемдыме балл кугытым, а ешартыш тергымаш дене эн шагалже 40 баллым погыман.

Вич экзаменым кучымо деч вара эн шуко баллым погышо абитуриент-влакым икымше курсыш тунемаш налыт.

М.С.Щепкин лӱмеш кӱшыл шинчымашан театральный училищын (институтын) национальный курсышкыжо тунемаш пурышо чыла ӱдыр-рвезылан тӱшкагудышто илыме вер, стипендий лийыт да институтын столовыйыштыжо кечылан кок гана яра кочкыш-йӱыш темлалтеш. А тунем толмекше, республикынан профессиональный театрлаштыже паша вер ойыралтеш.